أنا مبسوط

ممكن أكون مشوش و ببحث دائما عن شىء ما..
ممكن ابكى على أقل الاشياء ! و ساعات أبكى بدون أسباب ، ..
ممكن ليالى كتير أفتح شباك البلكونة او أطلع فوق السطوح و أبحلق فى السما بدور على نجمة و أو شوية نور جاى من أى مكان عشان مش لقيه فى حياتى..
ممكن أكون بنزل لوحدى أروح اللمة ورساله وأناكتس وأجتماعات و ألف و أبص للناس و أضحكلهم و أنا من جوا مش بضحك..
ممكن أكون مش عارف أنا عايز إيه..ممكن حاجات كتير أكون بعملها و فاكر نفسى مش مبسوط..بس الحقيقة إنى مبسوط جدا ..

مبسوط عشان لسه محتفظ بطفولتى..
مبسوط عشان لسه بقدر أحب الناس و مش بخاف منهم..
مبسوط عشان ربنا بيبعتلى شوية نور من فترة ل فترة حته لو قليلين..
مبسوط عشان لسه عندى أمل و مش ناوي أفرط فيه..
مبسوط عشان نفسى حلوة و مش بتقرف من أى حاجة..
مبسوط عشان ربنا بيسبب الأسباب فى حياتى دايما..
مبسوط عشان بحس إن ربنا بيحبنى..
مبسوط عشان ولاد و بنات الحلال اللى ربنا بيخلينى أقابلهم فى حياتى
مبسوط عشان بشوف الجمال فى كل حاجة و فى أى حد..
مبسوط عشان بحب اللف و المشى و الكتب والقهوة ومساعدة الناس
مبسوط عشان بعرف أعمل حاجات كثير بأيدى و أكتب و ألون و أغنى و أسمع و ألعب و أحب و أشوف و أضحك فى كل وقت و مع أى حد...
مبسوط عشان بصدق إن الخيال و السحر و الطيبة و النور لسه موجودين مبسوط عشان أنا مصري و شوفت الثورة و عشتها...
مبسوط عشان ربنا قربنى منه كتير السنه دى..
مبسوط عشان أنا إتولدت لسبب...
مبسوط عشان هلاقية يوما ما .. الحمد لله يا رب على كل حاجة
خواطر_مبسوط_سلام_نفسى