حيث تسكن صغيرتى !
10 June 2013 at 17:41
النهاردة بعد ما تخلصت من كل الاثقال التى تحيط بى بمساعدة صديقى طه
قررت أشارككم بجزء بسيط مما كتبت أثناء فترة الامتحانات .
_______________________________________
طيب النهاردة كان يوم حلو... كنت ماشي فى شارع من شوارع كفرالشيخ -حيث تسكن صغيرتى-
تعلموا لم أصدق إن الريح التى تأتى من ديار المحبوبة كان العربى القديم يتعلل بها ! والبرق الذى يومض من جانب واديها كان العربى أيضا يتملى منه ! الا عندما شعرت انا بنفس ذات الاحساس .
الشارع كان هادى وفيه شجر كتير و قديم و كبيير ومميز جداً ، لا أخفيكم سراً أعشق هذا الشارع من قبل أن أعلم انها تسكن فيه !!
الدنيا كانت فيها لسعة البرد اللذيذة غريب بعد يوم من الحر القاسى أمس !!
كتبت جملتى " محمد كان هنا" على العربيات المتربة ..
الناس كانت بترد لى الإبتسامة و بائع السوبر ماركت أما إبتسمتله ضحكلى و قلى أيه التفاؤل دة ..
وأحلى ما فى اليوم الست الطيبة بجلبيتها السودة كانت بتبيع مناديل وأول مضحكتلها ضحكتلى ضحكة كبييرة وقامت مسلمة عليا وعملتلى باى باى بكفوفها الكبيرة كأنها تعرفنى...
والراجل بتاع الزبالة ، لما روحت سلمت علية وقلتلة انتة بتقوم بخدمة كبيرة اوووى للوطن ،، ربنا يخليك لينا يااارب ويرزقك الرضا والاخلاص فى عملك ، متعرفوش الراجل دة كان مبسوط منى اد اية ،، كان عايز يعيط من السعادة كمان .
الناس الغلابة دول برغم كل مساؤ الحياة لسه قادرين يحافظوا على طيبتهم و حسن نيتهم..
والبنت الحلوة ماشية جمبى ،أصل الاطفال أحباب الله .. والشجرة عجوزة لسة قادرة تثمر ورق جديد ...
صوت فيروز الحلو القادم من محل بجوار منزلها !! ،، وجع السنان وأنا باكل أيس كريم متلج ، القمر وهو نازل ورا المبانى..
ويطلع وراه قرص الشمس ينور السما من جديد ..
السحاب اللى بشكلة على مزاجى.. الملايكه اللى مبشوفهاش بس بحس بيها معانا..
الأحلام جميلة أوى على فكرة
إنبساطى أنا و طه والسير مع استنشاق نسيم الصباح بعد كل صلاة الفجر، كل يوم من قبل الامتحانات بأسبوع
وحتى انتهائها ، ضحكنا و هزارنا وقناعتنا الى كل يوم نغيرها ونرجع فيها تانى ونغيرها ومنرجعش فيها وهلم جر :D ..
سجودى ودعائى لربنا و لما بيستجيب لدعائى
تعلمى دعوتنا خصصتهما لكى من قلبى منذ أن دخلتى حياتى ! - أعلمى جيداً أوجاعك هى أوجاعى أيضاً - اااا
..رائحة البخور الحلوة من امام مزلقان البلد ..
أخيراً وصلت البيت ، بسمع صوت قلبى قبل ما أنام و أتأكد إنى لسه فى الروح..
إيمان الناس المدفون جوا قلوبهم..دنيتنا الملونة..التفائل و الأمل اللى موجود جوا معظمنا بدون أى وجه سبب..
عيون الناس الخضرا و السودة و البنية ....نور الشمس اللى بيشع من بين الشجر بطريقة ساحرة..
كل ده نقطة فى بحر واسع عريض.. شعرت بيه النهاردة ،، الله موجود فى المطر والشجر والناس
و فى كل حاجة..الله كبير أووى أووى..الحمد لله :)=
الحمد لله يا رب إنك إدتنى عيون بتشوف الجمال ..الحمد لله الحمد لله يا رب :))
3/6/2013
ليست هناك تعليقات:
إرسال تعليق