القافلة الطبية بالنسبالى !!

شوية فضفضه..لآخر الليل

القافلة الطبية بالنسبالى !!


ساعات كتير أووى ببقى نفسى أستسلم و أهرب و أفقد الأمل ..

على الأقل مش هنحس بخيبة الأمل ولا بالحزن و لا بالقهره ..

وعلى أخر لحظة بقول لأ فى واحد مات عشان أنا أعيش..

فى واحد أمه و أبوه قلبهم مات عشان أنا أعيش...

فى واحد عينه راحت عشان أنا أعيش..فى امل كبير جااى فى الطريق 

و برجع فى رأيى..بس أرجع أفكر تانى..طب هنفضل لحد إمتى يموتوا فينا 

الفقر يموت فينا الظلم يموت فينا النظام يموت فينا  ..

مش بس بيقتلونا لأ..روحنا ..روحنا كل يوم جزء منها بيموت..بيروح عند ربنا..

بنضحك و بنبتسم ..بس من جوا فى مشاكل كتير تراكمت مش عارف هنحلها إزاى فى الأخر..

أنا يمكن أخر واحد أتكلم  حياتى حاسس انها حمل تقيل أوى على نفسى برغم بساطتها

ولما أنا أكون حاس بكده ..أمال اللى بجد تعبوا حاسيين بأيه..


الست العجوز الى كانت عايزة قطرة مش موجودة وتتحايل عليا اجبلها بديل !! بس 
مفيش !!
والست شايلة ابنها على كتفها يبكى من المرض او الجوع لا أدرى ، تبحث على أى

 نوع من الاهتمام والرعاية من اعيننا على الاقل ! 

واالعجوز حصل على دواء أما ألاخر فلم نجدة له فسأل على سعرة !! يستفسر عن 
سعر عبوة لا تتعدى الــ 3-5 جنيهات ! يسئل هل يستطيع شرئها ام لا .


 الى نفسى فية شوفت جزء منه النهاردة فى عيون أكثر من 300 حالة قدرنا اننا 

نفرحهم بحصولهم على علاجهم مجاناً  قبل ذهابهم لبيوتهم سعداء انهم اخيراً حصلوا 

على اقل حقوقهم فى الحياة علاج كريم .

الى نفسى فية أبوص على وشوش الناس دى كلها فى كل مكان فى مصر و أشوف 

ضحكه بجد..أشوف إبتسامه فرحة ..أشوف رقص و زغاريط..زهقت من الأسود 

..زهقت من الدم..زهقت من الموت و الظلم و القهر والفقر  و ناس بتجرى و إحنا 

إيدينا على قلبنا..ساعات بحلم إن كل قرى مصر الفقيرة  كلها ورد أبيض و نظيف و 

الناس كلها بتصقف و مبسوطه ..و إحنا بنعيط من السعاده ..

يا رب إرزقنا الصبر و الحكمه ..و إغفر لموتانا  ..

يا رب شويه نور فأنت النور..يا رب شوية أمل .

يا رب انت وحدك تعلم نوايانا فى رسالة فأجعلنا سلاحك فى هذة الحياة نحارب الفقر 

والمرض والعجز هنحارب عشان نجعل البلد دى أفضل وأفضل وأفضل .


. و تبقى تلك اللحظة فى ذاكرتى لما الأقى بنت عندها 6 سنين مبسوطة اوى أوى

وأحنا بنتصور معاها فى اخر اليوم وكل منا يستقبل  قبله  على خده منها فى سعادة
_____________________________

الرزق مش بس فلوس و أكل و شرب..الرزق ناس طيبة و حكايات حلوة و قلوب 

كبيره .. شوفتها النهاردة فى عيون كل متطوع لرسالة وتقريبا كدة أنا رزقى فى 

رجلى..شكراً #رسالة_كفرالشيخ

6ابريل
2013
السبت 12:30